去深圳住邊好？深圳酒店推薦．持續更新

以前係港人眼中，深圳係一個好落後好危險既城市，甚至有「單獨去廁所會比人捉去賣腎」呢啲都市傳說出現。不過近呢兩年深圳已經改頭換面，出現左海底撈、探魚、喜茶等熱門餐廳，吸引左好多香港人北上消費。

呢篇文就介紹一下我係深圳住過既酒店，等大家唔使次次都一日遊咁趕，可以兩日一夜食多幾間餐廳！

深圳上海酒店

四星級

第一次上深圳過夜，當然唔敢揀太過平既酒店，揀左係Hotels.com評價8.2分既深圳上海酒店。地點方面，搭地鐵係華強路站出，後面有大型商場九方同世紀匯商場，十分方便。

上海酒店其實叫上海賓館，係正格蘭雲天大酒店隔離，同樣係四星級酒店，規模就有點比下去了。不過實情就係格蘭雲天大酒店太宏偉JE，有哂噴水池有哂Bell Boy，咁都上唔到五星？

入到前台，感覺上海酒店有點陳舊，好在房間唔舊，豪華雙人房夠大，床亦好舒服；浴室乾淨，有兩個花灑一頭一尾可以一齊沖涼。呢個價錢呢個質素，推薦！

入住日期：2017年2月初

價錢：HKD$498.51 

優點：

．乾淨企理，夠大

．地點方便，附近有大型商場，近華強北

小缺點：

．冇浴缸，只有兩個花灑

．客房雪櫃唔夠凍，雪糕放入去好快溶

題外話　

九方商場B1有好多餐廳，例如榴櫣PIZZA樂凱薩薄餅、蓉李記等等，我地第一次北上乜都唔識是但揀左間「蔬予」。係蔬予你要自己出去揀獨立包裝好哂既菇同菜落籃，肉就係拎牌，再去比錢個到揀麵同湯底。湯底我淨係記得有藥膳，感覺似肉骨茶，好難得係大陸食到啲清清淡淡既野。成個用餐過程幾得意，不過返大陸係為左食重慶麻辣重口味既話就唔使試啦。

 

深圳卡羅精品酒店東門店

三星級

上次係上海酒店住得好滿意，對深圳酒店信心大增，於是就揀左間係Hotels.com評價7.8分既平價卡羅精品酒店。地鐵曬布站A1出口，跟住條紅線行，三分鐘就到。

見到下圖，搭升降機上去。

睇個外型同上海酒店完全冇得比，我地都驚訝卡羅精品酒店竟然咁都有三星！？會唔會同上海酒店一樣間房好好呢？

結果係冇反轉既，標準雙人房好細好簡陋，牆好薄所以唔太隔音，麻雀雖小五臟俱全，不過返到香港我地都覺得疑似比蚤咬！

另外我覺得個廁所有陣公廁味，不過港紙300蚊有間雙人房，值唔值就見仁見智，但如果我第一次北上過夜係住呢間，我唔會再上深圳過夜！

入住日期：2017年7月尾

價錢：HKD$304.00

優點：

．張床意外地舒服

．位置極佳，五分鐘到東門步行街

缺點：

．張床雖然舒服但我同薯生返到香港都覺得疑似比蚤咬

．廁所有異味(公廁味)，但薯生唔覺

．外觀、前台、裝潢完全唔似三星級，應該得二星級

題外話：

因為真係好近東門，所以我地夜晚落去東門買宵夜，搵到東門有檔係細個係鄉下食過既串燒，買返酒店食好開心。

深圳萬德諾富特酒店

四星級

呢次就試左國際酒店品牌諾富特(Novotel)，Novotel係香港都有幾間酒店，見深圳Novotel都係632蚊港紙，就襯一週年去住下慶祝！

搭地鐵係大劇院站落，B出口要經隧道行過去紅菱南路，要行經停車場先入到去。預訂既時侯我明明睇到話有浴缸，可惜去到又話要比多RMB80先有，計返就唔值所以冇加。

入住日期：2017年11月中

價錢：HKD$632.86

優點：

．客房內雪櫃飲品免費(四罐汽水)
．附近有大型商場KK MALL京基100
．附近好多餐廳小店

缺點：

．房間較幽暗

 

 深圳觀瀾湖渡假村

五星級

薯生既asia mile分未夠換兩張機票，咁岩見到用13,500分就可以兌換到深圳觀瀾湖渡假村，而觀瀾湖既評價十分好，所以就去馬了！五星級既渡假村當然冇得彈，由裝潢、門面、房間質素各樣都非常好，完全符合五星級既標準！

直接預約觀瀾湖渡假村酒店房間都係大約800元港幣，非常合理；想玩盡酒店同渡假村設施仲可以上官網訂套票，兩人套票由RMB1258起，我同薯生再去都會選擇Package！PACKAGE官網傳送門

延伸閱讀

想睇多啲深圳觀瀾湖渡假村有咩好玩，唔買套票點去觀瀾湖同有咩食？睇下呢篇：

【深圳】觀瀾湖渡假村．兩天一夜五星旅遊區

入住日期：2018年5月中

價錢：以ASIA MILES13500分兌換

優點：
．景觀一流，可以放鬆身心
．房間好大好乾淨好舒服
．鄰近有新城商場，有得玩有得食唔怕悶

小小小缺點：

．五星級酒店，電視機可唔可以換部好啲？
．冇買套票搭穿梭巴士要RMB60一位，偏貴！

深圳維也納酒店大劇院店

三星級

第一次星期五放工上深圳，我早就預訂左酒店到付RMB295既房，入住時間填左晚上11點。到我當晚11點到達酒店時，前台話我超時，冇保留我間房！！！我話remarks已經寫左入住時間是23:00，佢話要比左錢先會留房，但agoda從來都冇提示。 我唔知係agoda問題定係酒店問題，反正我當晚硬著頭皮比左RMB422先可以入住，畢竟已經晚上11點，我仲有選擇嗎？

講返間房，好彩間房質素好高，有浴缸，夠大，床又舒服；絕對值得RMB422，條氣順哂！不過link唔到wifi，打落前台問，佢搵左人上黎幫我地，不過要set一輪ip先上到。

酒店是推薦的，但agoda我就不推薦了，我預約過咁多酒店，從來冇遇過呢程狀況。提返，轉個彎就係我之前住過既NOVOTEL酒店，個人認為維也納更好。係Agoda留言講返件事，佢地既做法就係取消我個booking，做到咁肉酸唔要負評，都唔再考慮係Agoda Book酒店了。

入住日期：2018年8 月初

價錢：RMB295變RMB422

優點：

．地點方便，大劇院站同紅巔南站都近，即係話三條地鐵線都黎到！GOOGLE MAP未更新紅巔南站條地鐵線，我都係去先知！
．床又大又舒服，成間房都好大，感覺有四星！
．附近有大型商場KK MALL京基100
．附近好多餐廳小店

紅巔南路站C出口對面就係啦

缺點：
．上唔到wifi
．入住時間係18:00後一定要比左錢先唔好到付呀！

深港行政公寓（深圳龍華店）

三星級

市中心去到厭厭地，今次試下去遠少少既龍華區。個頭新開左幾個商場，不過原來冇乜酒店。選擇唔多既情況下我就揀左呢間深港行政公寓，一睇個名同啲相就知係Airbnb。

結果因為落大雨，我地搵左一個鐘都搵唔到(|||ﾟдﾟ)

地址係星河傳奇二期D座，不過個邊好多地盤，我地唔知點樣行去，問公安問保安都唔知，美團外賣哥哥叫左我地去深圳北店，就係第一期三A座。

507室是前台，深圳北店的人很好，幫我地聯絡龍華店的職員。擾攘一段時間，已經六點了，我們預約的房間好像給別人了（又！）

但這次我們已經付款了，最後龍華店的職員過來深圳北店帶我們到了叫鉑寓的大廈，這單位連電視都沒Set好，冰箱沒插電，相信是沒有人住過的。

公寓就是一個家的設計，不過很多東西沒有準備好，毛巾洗頭水等都要微信叫他送過來。全新的感覺還滿好(๑´ㅂ`๑) 如果你要去龍華區的話住這裡是不錯的，反正附近很多都是這種Airbnb，甚至可能是同一個老闆呢！怕難找就住深圳北店吧థ౪థ

順帶一提，唔好靠導航，一黎導航冇龍華店，其次係深圳北店既話佢會標示係呢間學校外既地盤，甚至薯生一度懷疑就係學校入面థ౪థ

紅山站出發去深圳北店

龍華店就在前面，如果沒有下大雨，沒有地盤的話其實沒那麼難。現階段要去龍華店的話就上塘站比較簡單，一直直走，不過確實的入口位我也不清楚( ͡° ͜ʖ ͡°)

上塘站出發到龍華店

這裡就是星河傳奇第一期，每一幢都是一樣的，找到令人想哭(╥﹏╥)

入住日期：2019年4月中(復活節)

價錢：HKD382

優點：

．很新

．附近有兩個商場(九方、上塘薈)，往上塘站方向有很多小店餐廳

．附近居民質素不錯

．WIFI可以使用Whatsapp

缺點：

．第一次來真的很難找

．床不好睡、枕頭太軟

．公寓式住宅，不能２４小時服務，登記入住時還用手機拍下我們證件

延伸閱讀：
深圳好去處．邊度喜茶探魚唔洗排隊？仲有間仙氣網紅店！

深圳好去處．歡樂海岸︳一品紅︳萬象天地

觀瀾湖．兩天一夜五星旅遊區
最近興上深圳一日遊喎