檳城四天三夜食食食自由行懶人包

 一直都好鍾意馬來西亞旅行，由吉隆坡、馬六甲、沙巴，到今次既檳城都感受到馬來西亞係一個好適合自由行既地方。

簽證

 香港到馬來西亞享有30天免簽，快閃都得！提返係檳城遊客每人每晚要收13令吉旅遊稅，由酒店收。

航班

今次Book左Expedia套票，四日三夜搭港龍直航住五星級酒店每人HKD2865。港龍直航去檳城既機唔多，一係朝早7點幾，一係15:20。薯生唔想咁辛苦去到冇精神，所以就揀左15:20班機，飛檳城要3小時30分鐘左右。

去到檳城已經七點，拎埋行李買埋SIM card都差唔多七點九。機場出發去喬治城大約30至45分鐘左右，介意少左日既朋友最好就揀返早機～如果唔係可能要預多日玩啦。

上網卡

係檳城落機之後，行去入境既時候就有四個counter賣電話卡：

有一兩間價錢好平，但仔細一睇都是頭兩GB高速，之後限速，結果揀左多人用既HotLink。四日內兩個人用一張卡再分享網絡熱點，網速都快，無試過收唔到！

酒店

因為知道檳城有grab，我地就揀左偏僻啲既五星級酒店，希爾頓逸林酒店 Doubletree Resort by Hilton Hotel Penang。雖然佢個名有Resort既字眼，但個人就覺得佢做唔到一間Resort應有既水平，除左isolated呢樣野，唔推薦。

【檳城】希爾頓逸林酒店 Doubletree Resort by Hilton Hotel Penang

換錢

薯生今次係香港用2000港幣換左1020令吉，即100港幣可得51元令吉。目測機場可以兌到52令吉，市中心有54令吉；喬治城、Gurney都有得換。其實唔會差太多不過要講下檳城物價，係喬治城食伍秀澤海南雞飯一份5令吉，係峇都丁宜食沙嗲10令吉有10串雞。

檳城最低月薪1000令吉，做到店長級都只係得約2500令吉；所以我地四日內已經消費左檳城既最低月薪。第一晚唔知物價既我地仲係酒店房叫左80吉令既Room Service，個下覺得好便宜的說......

行程

第一天：機場→希爾頓逸林酒店

第二天：牛干冬街(Chulia)→光大(Komtar)→姓周橋(Chew Jetty)→食物狂想館(Wonder food Museum)→汕頭街(Kimberely)→The Sanctuary SPA@光大→汕頭街

其實就係係喬治城隨意亂走的一天，要注意食物狂想館關門時間是18:00，我冇留意時間就吃閉門羹了，好在門位都有擺設拍拍照～～～

第三天：Gurney Paragon→Plaza Gurney→新關仔角夜市→峇都丁宜夜市

第四天：直接去機場吃KFC

檳城必買手信 實煮A1鮑魚麵

美食推介

　　

　　

【檳城】檳城超詳盡美食指南︳汕頭街四大天王︳新關仔角夜市︳峇都丁宜美食中心

交通

在檳城活動有四種方法：

1. 自駕：自駕遊的話可以去好多地方甚至大山腳，當地交通有規有矩，不過要注意塞車有時候塞的好嚴重，特別晚上出入峇都丁宜夜市。


2. 巴士：係檳城搭巴士，上車時同司機講目的地，跟Kilometer收錢。價錢當然平，我地搭機場巴士102搭左兩個鐘先到MIAMI BEACH，搭到好崩潰，每人4.7令吉。相信搭返少站啲既401E會好啲，不過另一問題係我比跳蚤咬到一腳都係，睇黎唔太乾淨！而且冷氣開到勁大，想搭既朋友最好著長褲同著外套呀。
   


3. 計程車： 我地今次都有搭到TAXI，可惜唔係BY METER，咁我地係傻仔既，上車前有問我地15令吉OK?明明GRAB只係5令吉就去到目的地，薯生一句「想試」就上左TAXI啦。上到去仲係咁比司機SELL我地一日遊，所以奉勸大家都係買上網卡叫GRAB啦～
4. GRAB：有GRAB既地方基本上交通就唔係問題，第一架GRAB個司機好熱情介紹我地去邊到食野，仲同我地講話原來我地到埗前落好大雨好塞車，我地好LUCKY！之後亦遇過一位講廣東話既司機，傾左好多野，最低工資都係佢同我地講架～最尾落車仲覺得傾唔夠呀哈哈！

雖然今次檳城實際玩既時間得兩日兩夜，不過都感受到檳城既文化同品嚐左好多美食！推薦想HEA想食野既朋友去檳城，今次每人都係洗左4000蚊港幣左右，超值！！！