事先聲明我冇收任何贊助，純分享
好遺憾，因為疫情關係我既婚禮都要延期。四季薈延期唔會額外收費，不過日期就要改到２個月內，而由於我地簽紙都會改期既關係，比政府個580蚊亦都要再交過。比起其他要改期既新人黎講，因為四季薈係一條龍服務，所以我地基本上只係通知親朋戚友就可以。
E Max婚展有兩層，分別係三樓同六樓，我地要換入場卷所以都係去六樓先。
六樓咁岩就係酒席既展覽廳，而一入去就係ClubOne既Counter啦～我地一直都打算係ClubOne擺，無他既，貪佢夠平同埋啲職員好熟悉流程，又多場揀，所以去婚展主要都係想睇下佢會唔會有多啲優惠。
去揀酒席一定要決定左日子同幾多圍先去，去到先可以問啲Sales你想擺酒既日子有咩場可以揀，特別係ClubOne呢啲連鎖集團，淨係九龍灣都三個場啦。我個人感覺ClubOne真係唔憂做( ͡° ͜ʖ ͡°)，我地講完邊日揀埋個場，佢就會叫我地等等，咁有負責個個場既Sales過黎答你野。佢地生意太好了，全個場好迫，所以拿拿林問完價錢同有咩優惠就完啦。我同男朋友感覺都好虛無，主要係因為無！優！惠！！！(☉д⊙)
然後我地係個場兜左兩個圈，結果比四季薈個Sky Hall 露天行禮吸引左，行過去就有人招呼你坐低啦。四季薈成個感覺係好貴好高級，所以我都係諗住聽下就算。我地想結婚個日已經得返Lunch時段可以選擇，嗚啊好搶手呀！不過老實講，以我地既Budget都係擺下晝好啲既～同埋Sky Hall既藍天白雲都係Lunch證婚會好啲（希望Big Day好天(*´∀`)~♥）。
係婚展的確係考Sales功夫的一日，而四季薈既Marketing亦都比ClubOne好好多，四季薈婚展優惠包括有：
1) Sky Hall證婚儀式費用全免，原價$14888
2) 無酒精飲品費用半價，原價$600/一圍
3) 12圍酒席95折
4) 後加圍數9折
聽落真係好吸引！再加上ClubOne無優惠既助攻，我同男朋友已經落哂塔，而最吸引我係佢既一條龍服務。事後睇返其實呢啲優惠並不罕有，除左婚展仲有Open Day都有大同小異既優惠。
結果我地訂左四季薈既中午中式酒宴，Package包括：
1) 12圍酒席
2) 婚紗及禮服各一（可選中式裙掛）
3) 新娘化妝及髮型一次
4) 攝影師一位及攝錄師一位
5) Wedding Planner 一位
6) 證婚服律師務（需要加$580）
7) 吉帖（跟酒席人數）
8) Candy Corner
9) Wedding Signage
另外我地再即刻加左6圍酒席 Total 18圍，係婚展既時候佢有同我地講到一個出門Package，就係加$9888蚊，多啲咩呢：
1) 禮服多兩套
2) 朝早出門既新娘化妝及髮型
3) 攝影師及攝錄師由朝早開始
講到呢到，唔知大家會唔會奇怪，新娘化妝及髮型同攝影師及攝錄師唔係Package包左架咩？本身package包既新娘化妝及髮型同攝影師及攝錄師只係由十二點開始，你朝早出門係唔包架(☉д⊙)。而新娘化妝及髮型呢樣野更加複雜，係係我試妝既時候先知要不斷加錢，下一篇再講。
因為呢個$9888既出門Package係婚展係冇優惠，我地就決定考慮下先再決定加唔加。酒席錢共十九萬，可以分三期找數。十九萬唔算貴，因為係ClubOne最低消費都要十五萬(晚宴) 。但千祈唔好以為十九萬就完，呢啲一條龍服務既收費係唔會就咁完結。
老實講，第一次去婚展真係感覺好水魚，我地覺得個Sales解釋得好清楚，開開心心咁離開個婚展（記得消費指定金額可以去返官方counter抽獎，我抽到好多衛生巾），然後到你過一排再搵返個Sales，問返出門Package既野，但佢話冇講過係婚展講過既野，其實真係好無奈，冇理由我同男朋友兩個人一齊聽錯。但因為婚展當刻你冇錄音，佢又冇寫低，所以根本冇得拗。提提大家，Sales講過既野最好要佢比Leaflet你睇，一係就要佢寫清楚。
另外條文細款好重要，無論你個下有幾攰都好，請你細心睇清楚每一條條款。四季薈既條款唔係陰濕亦唔係過份，不過睇左方便你安排，例如佢Package包左化妝師，但如果你唔用佢個化妝師自己係出面搵既話，佢新娘房12點先開放比你，12:30你就要放低哂啲野換好婚紗換好妝髮走出到，我就唔想咁趕啦。
用得一條龍服務其實都係比錢買個方便，我覺得真係慳左好多時間同精力，因為你唔使周圍揀婚紗裙掛，周圍試妝，又要比較攝影個啲，真係好方便。四季薈抵唔抵就見仁見智，有冇其他B2B可以講下結婚擺酒用左幾多錢比較下？疫情影響下，我覺得可以順利擺酒已經好開心，下一篇講下去試妝試婚紗既體驗(*´∀`)~♥
沒有留言:
張貼留言