四季薈My Seasons — 終於擺到酒啦！

經歷左兩次改期之後，我終於係原定日子既半年後擺到酒啦ヽ(●´∀`●)ﾉ

有睇我上兩篇講四季薈結婚文既朋友都知，我對四季薈既收費同服務都唔算好滿意或者好推薦，未睇既朋友可以睇返～

婚展初體驗—四季薈 My Seasons 擺酒抵唔抵？

四季薈My Seasons 一條龍結婚服務—試婚紗

不過呢篇係擺完酒之後打既文，我可以好肯定同好大力咁推薦你係四季薈擺酒！

感恩有好天氣

疲情下，觀禮限左二十人

首先要講返，疫情下好多野要作出改動，四季薈相對保守，佢地既措施比酒店遲，例如我有朋友係十二月既時候已經行緊20人一間房，分六間房擺酒，但四季薈要去到三月尾先做到，令我要改多次期。

以透明易拉架分隔
實在唔太美觀

不過比起2020年既新人我已經好幸運，因為公司明顯願意作出更多更大既讓步同改動去令我地如期擺酒。老實講，新人一直擺唔到酒，公司既損失係最大。

四季薈九龍塘場地係措施下只可以容納120人，即係10圍，錢就一定冇得退架啦，剩低既8圍可以之後再食。不過留8圍實在太多，最後我地將食物upgrade做晚餐，加加減減竟然有四圍剩，仲可以加Photo booth，Movenpick雪糕，紅白酒，回禮茶包，令到成個婚宴比嘉賓既印象更好更高級。

而令我咁推薦四季薈既原因係一條龍服務真係好好，特別係我所有裙同飾物都由My Wedding負責，老實講我係完全唔記得要揀飾物，係Final fit時佢問我先醒起(*´▽`*) 出門既時候可以帶少好多野呀！Final fit當日仲有同事幫我地度埋出門個run down，幫我地計埋點樣可以慳返攝影師既早費。(*´▽`*)

而Big Day個日由一踏入場地開始，所有野都可以交哂比佢地。你就可以入去個間好大既新娘房換婚紗啦(✪ω✪) 佢地仲安排左一個貼身既同事跟住你，大小事都會幫你做架！而且因為場地已經裝飾好哂，令我一班兄弟姊妹十分輕鬆，坐係到等開席就得～

雖然服務好好，不過有兩樣野我就覺得表現麻麻，要求完美既新娘就未必過到關啦！第一係佢地攝影師，整體感覺好求其好行，唔會影到一啲特別既shot。我之前做姊妹遇過既攝影師都會經常拎住相機影，希望影多啲唔同既角度，或者捕捉一啲特別既鏡頭，對一個婚禮黎講係非常重要。第二就係化妝師，我全日個妝都冇換過，只係輕微補過下妝。因為我影婚紗相遇到既攝影師同化妝師都好好，所以真係有好大對比。

老實講，而家好多新人都唔擺酒，只會去註冊處簽個紙就算。如果比我揀多次我都會簽紙就算，除左因為疲情搞到一鑊泡之外，中式出門真係好麻煩！！！不過一定要擺酒既話一條龍真係好方便，擺完酒就走得，唔使去還衫同埋執返好個場地，一袋二袋又怕有甩漏～值得比呢筆錢呀థ౪థ