深圳好去處．邊度喜茶探魚唔洗排隊？仲有間仙氣網紅店！．薯Blog

復活節四日長假即刻就上左深圳玩啦(〃∀〃)本身想去動物園，好彩我有睇天氣報告，原來個幾日會落雨，所以就揀啲商場去下算啦～市中心去到悶悶地，就去遠少少但好方便既龍華區啦。龍華區係福田口岸條四號線，成條線半個鐘多啲都搭完～高鐵深圳北站都係呢條線。

我今次想去既商場係上塘站既上塘薈同龍華站既壹方天地（最後去唔成），個頭冇乜酒店，所以就揀左間住宅式酒店，係紅山站同上塘站之間。而紅山站亦都有個九方商場，一出紅山站就會見到九方商場。

九方隔離呢個商場仔有間鮮粉匠，呢到所有腸粉都係加鮑汁，我地第二朝早餐入埋去坐低想落單，但太多人叫外賣，搞到腸粉要等半個鐘以上，所以就放棄左啦！咁多人食，應該好好食(*´∀ ˋ*) 除左腸粉仲有啲京味張同天天牛一，九方冇野岩食都可以過下黎呢邊～

九方門口間喜茶唔使排隊呀！不過野飲都要等五分鐘先有～因為多人叫外賣。仲試埋焦糖布甸，RMB9，不過不失唔使特登試。

九方商場都有好多野食，而且佢有miniso，今次黎深圳既目的之一呀～Kakao Friends同Miniso聯乘，得大陸既miniso有咋～我去左兩間miniso，啲貨都有啲唔同，因為有唔少商品已經斷左貨啦！

薯太戰利品(〃∀〃)

商場二三樓部分餐廳，有西貝同繆氏川菜，係深圳想知間餐龐多唔多人食，睇佢門口等侯區有幾大就知。

澄鵝滷鵝飯店

呢間仙氣網紅店—佬麻雀個門口設計好特別，取諧音「仙」同「鮮」，好多youtuber都試過，門口都好多人排隊。本身我以為間野係食麻雀(,,・ω・,,)，但原來係湘菜，賣「鮮」不賣辣。啲菜式好特別，評價都唔錯，龍華呢間九方算少人，大家如果黎開可以一試。

商場仲有超市同覔書店，就唔算多野行，不過都叫應有盡有。另外地下個層係有探魚架，就係喜荼個出口，KFC隔離，而且係冇人等位架～

跟住就開始去搵酒店啦，今次住呢個深港公寓真係好難搵，加上落雨令難度大大提高！搵左一個鐘先入住到 (╥﹏╥) 個人都係鍾意酒店多啲，不過龍華區真係少酒店可以選擇。如果你有微信個啲可以聯絡到負責人，其實深港公寓都係一個唔錯既地方。

想知去深圳過夜住咩酒店？

去深圳住邊好？深圳酒店推薦．持續更新

坐一陣休息下，已經天黑啦，行去上塘薈都好近～夜晚開左燈又幾靚喎～上塘薈其中一個特點係24小時營業，不過啲店鋪同餐廳就唔係！暫時知道得海底撈係24小時營業。

我既目標係個條殺人鯨！搭地鐵去上塘站一出就會見到架啦～仲有埋條尾架～

好巨大～呃Like打卡岩哂！

時間唔早要食晚飯啦～上塘薈係有好多野食，主要集中係地下個層，海底撈就係商場入面。我地就揀左呢間兩三事小郡肝串串香火鍋，建議食鴛鴦鍋，因為佢個辣真係好勁！越煮越辣！後期我地要係清湯煮熟再係辣鍋點一點～最推介係鴨血，綠色長盤RMB12有十塊，好好味！另外就係小郡肝同魷魚啦～其它串串我就覺得麻麻地啦，反而菜品會抵食啲呀！