深圳好去處．歡樂海岸︳一品紅︳萬象天地

上個週未第一次係星期五放工後上深圳，撞正打風落大雨TT 不得不讚皇崗巴士真係好快，港鐵都好快，18:00先係柴灣站上車，到藍田我仲食埋個鬼巴士18:40上車！

19:45左右去到皇崗會合友人食一品紅，我地去左分店（下圍二村）先知原來佢地係總店（下圍一村），事關兩間店只係爭兩條街五分鐘路程，真係好鬼FAKE。

冇食過分店，唔知總店好定分店好啲。講返我地去個間總店，地址係皇崗下圍一村2號，搭地鐵係福民站C出口行去肥仔海鮮大排檔個邊轉彎直行就係。

去到已經食緊啦佢地～所以我都唔知價錢同埋有咩其他野食，總之水煮魚就超好食啦！其他口水雞、涼麵都好食，相信是但叫都唔會太伏～

食完已經太夜，岩岩過左地鐵尾班車時間，好難先截到的士，出發去維也納酒店～我預訂左酒店到付RMB295既房，點知去到前台話我超時，冇保留我間房！！！唯有焗住比RMB422住，唔通真係返香港咩。

好彩間房質素好高，夠大，有浴缸，床又舒服；絕對值得RMB422，條氣順哂！唯一問題係link唔到wifi，凌晨一點幾打落前台問，佢都搵左人上黎幫我地，要set一輪ip先上到，不過薯生就淨係比左自己部電話佢set，所以我都係上唔到網既。

想知去深圳過夜住咩酒店好？

【深圳】去深圳住邊好？深圳酒店推薦．持續更新

第二朝起身慢慢HEA，因為我地遲入住，佢比我地下午三點先退房～正，落去食個LUNCH再返上去慢慢執野走。附近好多野食既，主要小店，但薯生偏偏揀著間冇乜人食既貴價餃子店，就真係唔係好掂；餐飯RMB86蚊，有40蚊都冇食到。另外酒店樓下轉個彎就見到間鹿角巷，睇落去好真！就買左兩杯試下啦，不過就唔係好岩我口味，下次係香港飲返杯睇下係咪一樣味先～

跟住就出發去萬象天地，當然是為了睇大象～～～萬象天地係地鐵高新園站，千祈唔好去錯萬象城呀！萬象天地既店鋪就唔太吸引，事關香港都有，反而個美食廣場好香，幾十蚊有大大兜水煮魚，可惜我地仲好飽，連喜茶都冇飲呀。

影完大象其實都冇乜野做，即刻轉去歡樂海岸～懶得轉線既我地去左華僑東站落車行過去。雖然我地冇網絡，但百度地圖支援離線使用，而且百度深圳地圖比Google Map準好多，推薦大家用。

行左十分鐘都冇就到歡樂海岸啦～歡樂海岸同水上世界感覺差唔多，不過歡樂海岸就有好多餐廳，高級又有，平價美食都有。而且歡樂海岸既建築風格走中國風路線，配合返隔離中華民俗村既風格，有啲位都可以影下相呃Like。

 

 個人認為最呃Like就係呢個超大棉花糖啦～不過都唔平，要RMB35起架！

深圳出名既餐廳係五點半後就開始多人，係歡樂海岸最受歡迎既目測係陳鵬鵬鵝肉飯店，超多人排隊呀！另外比較出名既西貝莜面村，潤園四季椰子雞都好早要排隊。我地就揀左間開始有人排既1001新疆菜試下，大檯已經要等位，好彩咁岩有張二人檯～

 

入到去就聞到好香，睇黎冇揀錯～ 串燒我地揀左羊同牛，RMB6串，好香孜然粉味，肉質尚算彈牙；仲叫左個十大必吃菜既紅柳烤串，大串啲既羊，肉汁多啲，但係盛惠RMB16！相當貴，我就寧願食返六蚊個隻啦。

十大必吃菜我地食埋乾煸炒麵(RMB28)同埋蔥炮羊肉(RM38) ，建議將兩樣撈埋黎食。在場好多人叫左羊排(RMB86)，薯生唔太食羊我就冇試啦～1001新疆菜可以一試～推介串燒！

食食下仲有新疆美女出黎跳舞轉圈圈

食飽就去返歡樂海岸商場行下，比較靜既商場，有幾間餐廳～大約19:55分開始，歡樂海岸表演舞台就會開始。係舞台睇據說係要收費，但係商場個邊都可以睇到一啲比較強勁既舞台效果，不過就唔會知係故事內容係咩啦。強勁既舞台效果包括19:55分會噴5分鐘水（搭配燈光效果），之後就要等到20:25分開始既煙花（約分半鐘），中間個半小時都會隔唔中噴下水，放一兩下煙花。

　　

睇完我地就搭的士去深圳灣口岸啦～提返深圳灣口岸去九龍既車係要過關前係深圳買飛，我地就唔知道，所以要搭去屯門再轉轉轉返屋企，都係皇崗巴士最好TT

延伸閱讀：
深圳好去處．邊度喜茶探魚唔洗排隊？仲有間仙氣網紅店！
觀瀾湖．兩天一夜五星旅遊區
最近興上深圳一日遊喎