係2020年準備結婚既同時當然要搵埋個安樂居啦～受疫情影響樓價都有輕微回落，斷斷續續睇左一年樓後，猶豫要租定買既時候終於係天時地利人和既情況下買左樓！以下就結合左我買樓既過程同經歷，好鬼長，希望比各位準業主一個參考( ͡° ͜ʖ ͡°)
１）搵按揭經紀幫你計下條數先！
第一步係要計算好手頭上首期比到幾多錢，同埋你月薪可以向銀行借幾多錢，根據budget去睇樓。除左首期要樓價既一成外，你必須要比既仲有地產經紀佣金、律師費、按揭保險、印花稅。而除非你好有錢唔使同銀行借按揭，否則你一定要先問清楚你過唔過到壓力測試，如果唔係分分鐘係比左首期之後要撻訂，捐失幾十萬架！
假設你要買650萬既樓，做九成按，你就要準備65萬首期、6萬5千蚊經紀佣金(可議)、律師費約1萬、首次置業印花稅23萬、按揭保險約29萬，加加埋埋都成110萬左右！其中按揭保險可以向銀行借埋，亦通常會有六成或七成折扣，而做八成按的話按揭保就只需13萬左右。
所以無論任何情況都推薦預先搵按揭經紀查詢，簡簡單單搵星之谷同埋經絡都可以（我冇收錢架）(´∀`) 因為按揭所需既文件係非常繁複，填錯或者交漏野都可能會影響到批核同埋成交期，而業主係唔使比佣金按揭經紀，仲有幾萬蚊現金回贈添！
２）揀樓仲要揀個好經紀
決定好地區同Budget就可以去睇樓啦～一個好既地產經紀真係非常重要，經紀最緊要係誠實，同埋要好清楚每個單位甚至係屋苑既情況。我地搵過五個經紀，其中一個係差到個單位成交左佢都唔知，而我地既出價仲要高過成交價(⊙_⊙)！！！仲有一個係唔識去個屋苑，搵到屋苑之後仲要去錯大廈禁錯人門鐘ಥ◡ಥ
我地仲試過去到單位走廊出面，入面有其他人睇緊，我地等左十分鐘之後人地經紀出黎同我地講比緊票簽緊臨約啦你地走啦。所以大家都可以帶定支票去睇樓，萬一遇到筍盤都可以立即簽約嘛！
睇完每個單位都要簽睇樓紙，三個月內你買個個單位既話一定要搵返同你睇樓個位經紀，保障返佢地～其實都有好大既漏洞，搵多個人一齊去睇幫你簽都冇你符。經紀佣金可以相議，如果跟左你一兩次就成交到既可以壓下佢半佣～我地個個前後跟左一年所以就輕輕壓個九折。
至於睇樓睇啲咩我就真係唔識，憑感覺架咋ಥ◡ಥ 不過睇得多自然就有感覺，簡單黎講我會睇單位有冇滲水同埋有幾殘舊，日光日白都要開燈睇，咁先清楚。另外睇下賣家有冇改建過個則（咁大件事經紀都會預先講，佢唔知就換經紀啦），睇下會唔會有渠係室內，睇下個景咁。當然走廊同大廈成個環境都要睇埋，因為我係買返自己區內單位，所以本身都熟悉各個屋苑附近環境，如果唔係要睇下附近交通同民生呢啲基本野啦～
３）簽臨時買賣合約
同賣家傾好價錢就可以簽臨時買賣合約，第一次買樓真係好激動好開心(ღ˘⌣˘ღ) 只要你事前功夫做足，確保夠錢就基本冇問題～黎到呢一步經紀都會一直guide住你。簽臨約時就要比訂金佣金同埋決定好成交日期，記住要預留兩個月處理按揭，唔急可以預夠三個月鬆動啲。簽完臨約後十四日內就要約律師見面比埋淨返既首期、稅同埋做份正式買賣合約啦～
４）申請按揭
簽完臨約就可以即刻搵按揭～有大量文件要處理，非常麻煩，始終係要同銀行借幾百萬ಥ◡ಥ 第一次買樓一定唔識，一係搵按揭經紀，一係做多啲資料搜集！按揭通常會申請三間銀行，留意返律師樓有邊間銀行既按揭係唔接受。
銀行既offer真係好浮動，有時仲要等好耐架( ͡ʘ ͜ʖ ͡ʘ) 事後我地問返銀行先知點解我地等咁耐，原來係經紀冇啦啦幫我地借埋按揭保險，搞到壓力測試去到岩岩好59.9%！(唔可以過60%) 所以銀行個邊要過多幾關先決定借比我地！我地個按揭經紀係細公司，同事親戚ಥ◡ಥ 所以真係建議搵返星之谷同經絡呢啲做得好熟手既經紀。
而家都係H按居多，可以上討論區睇下近期同你差唔多loan size會比咩offer，要比較個利率之外仲要睇下按保幾折，現金回贈(CR)幾多，同埋early repayment綁你幾多年。決定offer後去銀行要處理一大輪開戶手續，銀行會送個高息按揭戶口，利率同你H+個%一樣，有剩錢記住放哂入去，每個月收息都幾和味！
最後就去律師樓補齊所有文件同埋有啲lum sum，例如上手業主已經比左既管理費同差餉咁，記住唔好盡信律師既文件，要查清楚單位地址同價錢等重要事項。我地個次就係比lum sum既時候律師問我地收埋按揭保險，但我地明明係同銀行借埋，個師爺仲要死都唔認錯，解釋左十五分鐘先聽得明！
搞掂哂就可以等收樓啦(づ′▽`)づ 恭喜大家！可以開始煩裝修啦！ಠ౪ಠ
法官媽媽，律師爸爸，中學生哥哥和妹妹；
回覆刪除從家庭到法庭，在生活中親身體驗的法律常識。
最接地氣的非典型女法官——綽號「章魚法官」的張瑜鳳
寫給大家都看得懂的國民生活法律素養讀本
從法庭到家庭，第一部結合法律常識的趣味連續劇