四季薈My Seasons 一條龍結婚服務—試婚紗

 上一篇同大家講完係四季薈 My Seasons 擺酒抵唔抵？，主要就介紹左一條龍服務包啲乜，呢篇就講下試婚紗同試妝啦。

四季薈包既婚紗都係旗下My Wedding出品，My Wedding除左有婚紗之外仲有化妝Set頭，影Pre-Wedding同婚禮拍攝既服務。我一條龍服務入面只係唔包Pre-Wedding，老實講，睇佢地攝影啲相真係一啲都唔吸引，包括package有既婚禮拍攝。如果好著重照片質素，我就建議都係出去搵過啦！

講返試妝髮同婚紗，當日我一次過做哂，基本上當日個LOOK就出哂黎啦(*´∀`)~♥　先試妝髮，妝同頭都係好平平無奇，因為你冇得揀佢地邊個化妝師，就算再試都好有可能係咁上下。如果唔係一條龍既話我就真係唔會選擇，而家唯有揀啲唔好咁複雜既髮型啦。

打到呢到我都好無奈，一條龍既局限真係好大，建議好在意，或者好重視婚禮一切既人真係唔好貪方便揀一條龍服務。誇張啲講，你唔會得到一個好完美既婚禮。

到試裙，package總共有四套衫可以揀，包括裙褂，婚紗，晚裝，新郎西裝，奶奶裙，而我就好自私咁揀左裙褂，婚紗同埋兩套晚裝ヽ(●´∀`●)ﾉ　而家諗返，中午其實一套晚裝就好足夠啦，搞到成個Rundown好趕，不過女人一世人著晚裝機會唔多，緊係想著多條啦(❛◡❛✿)

婚紗同晚裝任試，佢有部Ipad入面有哂所有款式號碼，想試邊件抄低個號碼就得架啦～而My Wedding官網同Facebook都有好多相可以睇，款式好多，可以預先睇定。職員都十分友善唔會催趕你，成個試衫既環境都好靚好寬敞，正( • ̀ω•́ )　不過影相就一定要用佢地部相機影，佢地會將啲相即刻Upload上Ipad比你睇，建議睇完相先決定，我就有件晚裝係照鏡靚但上鏡一般。

小小提示，原來試妝後個人已經會好攰，我係廢Ｊ。　比我揀多次我會分開做呢兩件事，確保我可以更集中去揀衫同試多幾件衫。

唯一要挑剔就係，雖然佢啲裙好靚，但著上身竟然覺得啲料好差好吉，試一試上身都搞到紅紅地！質地要好就真係要揀佢premium既裙，要加$1000。最尾因為我想大拖尾，所以都加左呢$1000(´_ゝ`)

裙褂方面有三條比我揀，如果揀銀線最多既大五福要加$800，小五福唔使錢，不過都要睇返自己襯紅色多啲定銀色多啲。

所有衫揀定左再轉要加$1000一件。

到比錢既時候，真係令人好頭痛。首先我要加$9888個出門package，另外婚紗我揀左件premium要加$1000，呢到都清清楚楚明明白白。然後佢就會Free左你500蚊既試妝費，不過就突然同你講「出門package包既化妝師都唔係跟你全日架」，我DLLM！點解呀！？咪加左錢囉！個Leaflet都完全冇講！

唔知大家睇到呢到會唔會同我當時一樣咁混亂，原來出門package只係包你朝早中式裙褂個妝同頭，即係而家化妝師總共只會幫你化兩次妝同兩個髮型，即係我婚紗個頭要Last多兩套晚裝，中間你唔好喊呀，冇人幫你補妝架。

要化妝師跟足全日貼身服務，加二千零蚊就可以，不過乜都係咁加加加，我地真係唔太鍾意所以冇加到。好彩佢都有offer第二個選擇，$680多一次妝髮，聽落合理啲，亦都夠用，就決定加了。

最後提提，如果訂金未比哂，可以係試妝試婚紗個陣係D2 Place比埋，唔使特登去九龍塘／尖沙咀比都得！

終於擺到酒啦！