盛惠千一蚊︳超有名的黃晉虎師傅幫我擇日結婚！

終於嫁得出啦！

香港地結婚繁複，事前要準備好多野，有唔少人都會提早年半準備，加上2020年係雙春兼潤月，結婚都要爭餐懵！好似我聖誕節先求婚，第二日即刻要上網做功課同開始預圍數(っ´ω`c)

結婚第一步當然要擇日先啦，如果唔係乜都做唔到呀(っ´ω`c)

上網睇又要避新人同雙方家長既農曆生日月份，清明同鬼節既月份更加要避，有啲仲話正月都要避，咁避法一年得返三個月可以揀！

見咁煩，我地打算揀個12月既weekend，寫住宜嫁娶又有場就算，點知一睇通勝發現揀個日沖我！

商量下決定都係出去揾人擇日，比幾百蚊人地賺，因為我地第一次去黃大仙乜都唔識，上網資訊又唔多，去到真係唔知點算。多人等既要等好耐，冇人睇既我地又唔敢試驚佢流，最多人講既「黃晉虎」冇開，行黎行去都揀唔落！

行左三四個圈，我地再上一樓黃晉虎個到，發現佢返左黎見緊人，既然咁岩就坐係門口等啦，結果短短20分鐘內已經有5個人係我地後面排隊！真係好誇張！！！

好好彩等左20分鐘就入得，都有少少期待。去擇日無論揾邊個，都要準備新人既時辰八字同父母出生年份。黃師傅會抄係張粉紅紙到，另外會叫你比個範圍佢，例如年頭定年尾，幾月至幾月咁。跟住佢就會開始「背默」咁寫哂啲宜嫁娶又冇沖新人同父母生肖既日子比你，然後就會拎返本通勝出黎「對答案」，黃師傅咁出名當然100分滿分啦！

想睇黃師傅背默，盛惠800蚊！想要埋過大禮上頭出門既吉時就可以係擇好日子後再揾黃師傅，呢次比多300蚊je。咁岩撞正武漢肺炎，我地影返張粉紅紙whatsapp黃師傳，payme過數後好快佢就會寫哂其他吉時比你，仲會錄音親自解釋，一定係本人呀！

抵唔抵就見仁見智，不過結婚擇日可能真係唔使揾最出名個啲師傅都得，一黎價錢貴幾倍，二黎我地真係好好彩先唔使等返粒幾鐘。要注意有啲師傅只會比三個吉日，好似幫你揀左三個最好咁，不過以我所見其實真係睇返通勝唔沖大家生肖同宜嫁娶就ok, 冇話邊三日最好。

想見黃師傅，最好都係whatsapp 預約左先。